Heykəldə tünd bürünc materialın relyefvari toxunuşları Qarabağın qədim qalalarının, uca məscidlərinin və möhtəşəm memarlıq abidələrinin detallarını qabardaraq çoxqatlı bir mənzərə yaradır.
Pilləli quruluş və şaquli yüksələn formalar işığın səthdə yaratdığı zərif kölgələrlə birləşərək, regionun zəngin və bənzərsiz simasını formalaşdırır. Hər bir memarlıq elementi tarixin dərinliklərindən gələn bir yazı, bürünc material isə bu Salnaməni əbədiləşdirən sarsılmaz bir vasitədir.
Qala divarları və qədim tikililər sanki qayalıqdan doğaraq təbiətlə mədəniyyətin harmoniyasını, bu torpaqların köklü keçmişini xatırladır.
Bu obraz sadəcə bir ərazi təsviri deyil, mənəvi bir ucalıq nümunəsidir. Kompozisiya Qarabağın mədəni dirçəlişini və bərpa olunan irsini vəsf edərək, Böyük Qayıdışın mənəvi zirvəsini təcəssüm etdirir.
