Fərəh Quliyevanın torpaqlarımızın düşmən tapdağından azad edilməsindən ruhlanaraq ərsəyə gətirdiyi “Vətən qucağı” əsəri Qarabağın zəngin memarlıq irsinin və füsunkar təbiətinin rəsmin dili ilə ifadəsidir.
Müəllif əsərində regionun rəmzi məkanlarını təbii elementlərinin sadəliyi və sakitliyi ilə birləşdirir. Şuşadakı Gövhər Ağa məscidinin, qədim alban monastırının günbəzinin və qədim Laləzar körpüsünün memarlıq siluetləri ilə təsvir olunan ağaclar arasındakı harmoniya Qarabağın tikililəri və təbii dünyası arasında olan ayrılmaz bağdan xəbər verir.
Rəssamın təmkinli rəng palitrasından istifadə etməsi insanda dərin hüzur hissi oyadır, onun qrafik yanaşması isə diqqəti mərkəzi mövzulara yönəldir.
“Vətənin qucağı” əsəri sadəcə səhnə təsviri deyil, həm də bölgənin mədəni irsi və onun əbədiliyini vurğulayan laylı kompozisiyadır.
Vətənin vizual hekayəsi sayılan bu əsər insana sülh və vətənpərvərlik hisslərini aşılayır.
