Nərmin Nadirovanın fırçasından doğulan “Hüzur” əsəri Kəlbəcər rayonundakı əzəmətli görünüşü ilə diqqəti ilk baxışdan özünə cəlb edən ən əhəmiyyətli orta əsr monastır komplekslərindən biri olan Xudavəng monastırının bədii tədqiqi, qədim Qafqaz Alban sivilizasiyasının təcəssümüdür.
Teksturalı tünd çalarlarla zəngin olan rəsm əsəri Azərbaycanın yaşıllığa qərq olan dilbər guşəsində inşa edilmiş müqəddəs kompleksin memarlığının gözəlliyini, insan qəlbini riqqətə gətirən təbiətin ecazkar lövhələrini ön plana çıxarır.
Rəssamın torpaq tonları və yaşıl çalarlardan ibarət palitrası monastırın daş konstruksiyalarını təbiət ahənginə uyğunlaşdırmaqla yanaşı, insanın mənəvi aləmini, onun könül dünyasını zənginləşdirir, yaradılış və inamın vəhdətini simvollaşdırır.
Müxtəlif inşaat materiallarından, fərqli memarlıq üslublarında inşa edilmiş, dini və dünyəvi süjetlərə malik relyeflər, oyma naxışlar və epiqrafiya nümunələri ilə bəzədilən monastır kompleksi ən qədim dövr incəsənətinin, mədəniyyətinin əsrarəngiz nümunəsi kimi nümayiş olunur.
Müəllif əsərdə Xudavəng monastırının fiziki əzəmətini göstərməklə yanaşı, bir rəssamın harmonik dünyasını tarazlayan fırça vasitəsilə mənəvi sakitliyi, hüzuru da ifadə etməyə çalışıb. Bu əsər Azərbaycanın qədimliyini, zənginliyini, rəngarəngliyini özündə ehtiva etməkdədir
